إزاي ابتدى حلمنا يتحقق وهنحول الصحراء لجنة خضراء؟

من يوم ما استلمنا أرض وقف النخيل الخيري “Palm Oasis” في 30 ديسمبر 2023، وبدأنا أول خطوة في مشروعنا الكبير، كانت البداية مليانة تحديات، لكن رغم كده كلها كانت مليئة بالأمل والتفاؤل.

بعد ما حصلنا على الموافقات اللازمة من صندوق الأراضي بمحافظة الوادي الجديد، وصدر ترخيص حفر البئر في أكتوبر 2024، تعاقدنا مع شركة متخصصة في حفر الآبار. بفضل الله، بدأنا بالفعل حفر البئر ووصلنا لعمق 725 مترًا، إلى الخزان النوبي، الذي يحتوي على احتياطي ضخم من المياه الجوفية، ويمتد تحت أربع دول: مصر، ليبيا، السودان، وتشاد .

رغم أن المياه تبدأ على عمق من 300 إلى 350 مترًا، والتكلفة هتكون أقل لو وقفنا عند العمق ده، إلا أن هذه المياه مصدر غير متجدد، وفي أي وقت ممكن يحصل جفاف في بعض المناطق. ولأن المياه هي أساس الحياة ، كان لازم نكون حريصين ونضمن الأمان والاستدامة للمستقبل. علشان كده قررنا الحفر لعمق 725 مترًا، وبالرغم من التكاليف العالية، إلا أن ده هيضمن لنا مياه مستدامة بجودة عالية. المياه في الخزان النوبي ملوحتها قليلة جدًا، تكاد تكون معدنية، وده مثالي للزراعة .

من أول يوم في المشروع، واحنا بنشتغل مع أفضل الخبراء في كل المجالات: من تخطيط الأرض وتحليل التربة، إلى شركة حفر الآبار. حاليًا، بنفاوض مع شركة متخصصة في الطاقة الشمسية لتوليد الطاقة اللازمة لاستخراج المياه من البئر . ومن المخطط إنشاء بحيرة صناعية لتخفيف درجة حرارة المياه بعد استخراجها (لأنها بتوصل أحيانًا لـ45 درجة) وكمان هتساعد في ترسيب الحديد الموجود في المياه، اللي ممكن يسبب مشاكل في شبكة الري. بعدها، هيتم بناء سور شجري من شجر الجزورين لحماية المزرعة من الرياح المحملة بالأتربة .